Umbuliso...!

UMpumezo usendleleni evela emvuselelweni ukufumana kwakhe icall evela komnye wabazalwane akhonaza naye;

Mpumezo: (Ethetha efowunini) “Akhange ndibone mna lonto mzalwane wam. Yenzeke nini kanye?”

Siyabulela: “Kanye ngelixesha uthandazela lamfo ebesamkela uYesu...!”
Mpumezo: “Heee?”

Siyabulela: “Ndikuxelela ukukuxelela mfondini. Kaloku wena ubusizele ngomva, andithi? Ngoku lamfundisi uxakekile uxambulisana noThembela, kodwa ke okwangoku sona isizathu asikaziwa, kodwa iyakrokreleka imbangi yoko. Into yokuba umfo lo, unento yokwenza nosisiza lo, kodwa basayiqhushekile”

Mpumezo: (Esamangalisekile) “Mfondini akulunganga ukuxoka ngendoda ka Thixo, kwaye uyakukohlwaya uThixo uthi saaaa inzwane mkhonzi...”

Siyabulela: (Ehleka) “Kaloku mfo ka bawo! Lamfo usibetha sithi saa isono. Iyasothusa ithi kanti naye udada kuso, kwaye uyasitya”

Mpumezo: (Ebheka-bheka elungiselela ukuwela indlela) “Iyandidanisa ke lento undixelela yona mfo s'caka. Kaloku, xa ukholwa, akukhathaliseki nokuba usityela ehotele isono, isekwasiso isono kwaye u...!”

Siyabulela: (Engenelela) “Nokuba ungasitya nge FORK and KNIFE mkhonzi? Isekwasiso?”

Mpumezo: (Ephelile yintsini) “Nokuba usigalele iAROMAT kaloku nceku, sisono eso!”

Siyabulela: “Ndiyakuva ndoda ka Thixo! Abazalwane basadinga ushunyayezwa ngakumbi mhlobo wam. Basaqubha kuso isono kwaye bade bathi kunzima ukuphuma kuso.

Mpumezo: “Ingumsebenzi wethu ke leyo ntanga. Kumele siqinise ngakumbi ukushumayela, singene ngakumbi endimeni kwaye sime phakathi komtyholi nabantwana bakaThixo.

Siyabulela: “Ndiyakuva ntanga, ndikuwe kwelo”

Mpumezo: “Sidinga amadoda neentombi ezizakumela inyaniso enguKrestu! Silwe isono! Silwe impi ka Sathane (Evulwa kwigumbi lakhe langasemva kokwabo) ukunqoba kokwethu kwaye sinako, ntanga”

Siyabulela: “Ndinawe nakwelo wakuthi. Thina sizindlalifa zezulu, sizizo izitya zokuphatha imfihlakalo...! Mandikuyeke uphumle nto yakuthi. Ushumayele ke namhlanje kulamvuselelo. Ubugcwaliswe ngamandla avela enyangweni kwaye ubuvutha bhe! Ulale kakuhle ke mkhonzi”

Mpumezo: “He! He! He! Kwekh, ndiyabulela mfo kabawo. Ulale kakuhle nawe...! (Alubeke ucingo)

UMpumezo khulule isuti kanokutsho ayifake ewodrophini yakhe. Abethe ngesikipa sodwa kunye noshoti wangaphantsi kuphela. Phezu kwebhedi yakhe kwaye kugcwele imfuxu-mfuxu yeempahla zakhe, kwakuzo kukwakho ezimdaka kunye nazo ezicocekileyo zikwakhona. Urheme akhange ondlule kwasekuseni evuka. Kwalapha phantsi kuthe saa izihlangu, izikhindi, iikawusi, amaqhina, iincwadi kunye nezitya ebetyela kuzo.

Uzijule phezu kwebhedi umfo omkhulu kwaye ekude ngokweengcingane;

“Njani uThembela axambulisane nomfundisi phakathi kwabantu nokwenza? Ibe bekukudala ndimxelela ngalento yena eyiphika. Le yokuba udyola noMruti. Kum, uyiphika ame ngomlenze omnye kwaye andityhole ngokungamthembi. Lo mfo icacile uyathandana noThembela. USiyabulela yena ingaba akakrokreli nto ngam nothembela? Ukuba ikhona into ayaziyo, kutheni angandibuzi? Kutheni angake andith chwethe nangayo lonto? Ndimazi kaloku akamfuni umntu ophuma ecaleni. Ukuba bendiphangela, bendizakusuka ndimtshate uThembela kuphele ukuxoxa, ndiphume esonweni, ze nam ndikwazi ukusilwa kakuhle isono. Kodwa, uThembela yena ndiyamthanda kwaye ndijonge lukhulu ngaye. Mhle, ucula kamnandi, uyakwazi ukuthandaza, uyakwazi ukuvula inkonzo, uyakwazi ukwamkelisa umntu uYesu. Kwaye unothando....! Make ndimfowunele!”

Aqubule iphone yakhe, akhangele igama lika Thembela kwi phone yakhe, amfumane; amtsalele umnxeba. Ngelishwa ithi kanti ivaliwe. Azame kwakhona! Nkqi!

“Iyandikrokrisa ke lento...! Makube utheni bethu? Inoba iflethi kodwa! Phofu ndakuzama ukumfounela kusasa. Lonto suke ndalamba. Sekuvaliwe endlini. Mandizame ukujonga ama-Somalia ukuba andinakufumana isonka nefrentshi na, okanye ndiyojonga icala lentloko yegusha kwaMaMqhinebe...! Akuzithwa ndiyaziminca na apha ekhaya xa ndilahla amathambo kusasa? Phofu nditya imali yomnikelo kaloku...! Mandninxibe ndiye...!”

Alungiselele ukuyothenga...!

#DOUO