Waqonda ngqo phantsi kwebhedi umfo omkhulu sele evuza izinkcwe kakade.
Wafaka isandla ephutha-phutha ngaphantsi kwebhedi ukukhangela la plate
inenyama yakhe. Suke waguqa namadolo kucaca ukuba akafiki kuyo okanye
makube iimpuku zimke nayo. Wabuya naso esositya sinentloko yegusha, sele
intushu-ntushu ukuba mdakana, kaloku, inkunkuma ephantsi kwaloobhedi
nkosi yam! Uthuli oluzimele apho...!
Kwakungekho nto ingekhoyo eyinkunkuma, amaphepha ee-chips, aweelekese,
amathambo, iingququ zezonka, iintshwela ezomileyo, kuya le kuya le!
Yayomile lontloko kucaca ukuba ibethwe kanobom yingqele. Enqumile
amanqatha kwaye ukuba wawunokuyitya leya ngokuya injeya, wawunokuhlafuna
unyaka onesiqhuma! Yayingasaphelelanga tu, iimpuku zaazalisa oovimba
neefriji zazo ngokuqinisekileyo.
Yamcaphukisa le lento urheme
kodwa akazange ajike. Ayesele ekrukrutheka amathumbu yindlala kwaye
elambile. Wayivuthulula lanyama, wayicukuceza wayihlamba, wayifaka
embizeni ukuba itsholoze. Wayinonga kanobom ze angavi vumba lampuku.
Ngoku esalinde ukuba ibe ibila imbiza, wabe waqubula idrinki yakhe emva kwekhabhathi;
“OH! Nkosi yam! Yintoni nale indehlelayo?”
Wavakala esitsho unkabi kwaye sele ngoku limyile. Kuthe kanti ulibele
ukuyivala labhotile yedrinki. Ngoku yayithe mome ziimbovane. Kucaca
ukuba kwazona kudala ziziqubhela kwelolwandle limnyama, ndase ndacinga
Ama-Sirayeli ewela ulwandle olubomvu. Yabe naledrinki sele iphelelwe
nayi asidi....! Uzakuyithini bethu? Wazama ukuvuthela, osule, asuse,
agutyule ezo zifele pha phakathi! Kwekh madoda! Ungayilahli nje Mpumezo?
Phofu, ikwayile mali yomnikelo.
Mpumezo: (Ethetha yedwa) “Hay,
makube ezimpuku nezimbovane zithunyelwe ngusathane uqobo. Suke nje
zidle isopholo yendoda kaThixo? Hayi kumele ndike nditshize ngesiwasho
nangala oil kamfundisi. Mhlawumbi zizakuphela!”
Sele silungile isidlo sakhe umfomkhulu, ngoku ukhukhuza ithambo lemehlo kwaye ukwezikude iingcingane;
“Kanene namhlanje kuzakuma umfundisi ePulpitini. Kwekh madoda,
namhlanje akukho nesenti ezongena kwaye lamfo uvele ayibuthe yonke xa
kushumayele yena. Nentshumayelo yakhe soloko ingqale emntwini, soloko
iqulathe amatye, soloko yena esilwa xa eshumayela. Ubone
nalamaxhegwazana enyuruza ukunyuswa nguMoya oyiNgcwele (Esahlula inqatha
lemehlo kubini, ethath izilayi ezine, efaka elamehlo phakathi, eluma
kanobom) Mmmmmmh! Mhm! Mhh! Mhm! Zimnandi ke ezintloko zikaMamQhinebe.
Akugqiba ukudla. Unkabi uphindele ebhedini sele edengile kukuhlutha,
isisu sele singumpatsiya. Wanyoshoza ukuvula iingubo, wasole wangena
ngeempahla kukonqena ukukhulula. Umoya wangemva (Umthsulo) ewuyeka nje
uphume ungagadwanga. Yayisebe ibophile nalondlu livumba lomoya
wasegwadana. Walala.
Ngentsimbi yesibhozo ekuseni njalo, kwavakala kunkqonkqozwa emnyango!
Ilizwi: (Elungomba ucango) “Mpumezo! Mpumezo! Mpumezo! Vuka! Vuka! Mpumezo!”
Mpumezo: (Esabelela kude esesebuthongweni) “Heee?”
Ilizwi: “Uthi gerhe ku?”
Mpumezo: “Mama”
#DOUO
No comments:
Post a Comment